تبلیغات
آیاپیر (خرم سعیدی ) - شعر بختیاری - شعر فارسی - مطالب ابر شعر نو لری
 
آیاپیر (خرم سعیدی ) - شعر بختیاری - شعر فارسی
فرهنگ و ادبیات بختیاری
دوشنبه 17 تیر 1398 :: خرم سعیدی
" گُدارِ دل "

مُه وِ رَودگه،کِلاک اِزَی چِرا وِ دَس
دینِ مال زیر شَو اِگَشت
اَفتوِ صَوق وِ گُرگ لُق
کُهنه ریسریِ شَونِ وَرُواند
چَرت لُونِ سَوز سیریِ دِرَهدِ تَئر
سایه سارِ آسمون اَوی
گُل وِ کم طاقتی وِ خرس تی
تَش بلازیی بِکِی
غَم غَریوِ اَویِ رُو
نالِ نالِ شَو وُ رُو
تا نِسَه یِ اُو گُدارِ دل
پاوِپا بِکِی
سی نیشتنِ گُلِ ،ریِ تُولیین .

#خُرم_سعیدی تابستان ۹۸




نوع مطلب :
برچسب ها : شعر نو محلی بختیاری، شعر نو بختیاری، شعر نو لری، خرم سعیدی، گدار دل، خرم سعید،
لینک های مرتبط :
شنبه 8 تیر 1398 :: خرم سعیدی
هار هار هارنک
بَرد وَسِه بَهرمون
مِن گِرده زَمون
دریای هُمدلی،چُورِسته ای دَمون
هار هار هارنک
مُستانِ دین وِیَک
قارنین یَه صدا
اَی صُوِ پاوِما
تُون شیرِ دات وُ اُو اَفتَویِ رُه رُها
#خرم_سعیدی تابستان ۹۸
آزادیِ بِزا، آزادیِ بِزا




نوع مطلب :
برچسب ها : شعر نو بختیاری، شعر نو لری بختیاری، شعر نو لری، خرم سعیدی، هار هار هارنک،
لینک های مرتبط :
جمعه 3 خرداد 1398 :: خرم سعیدی
" خَو پلا "
گُمبَک اِی زَید همو پازنِ احساس دلم
تیه بستم کِه بیا وَر نظرم
بُویِ میِ شَوِ کالی وِ تیَم
محشره پهنه ی صحرای ولات
سوزِماری منِ آیینه شوق بید وِ دَو
تک وُ تُوکی گل اِخندس من ریت
مال بار ونده منِ " دینارون "
جُورِ پاتیل پتی
گلِ دَوروون دلِ بچه اِیام فاش اِی بی
اُردیِ آساره با اخوردن وا یک
شو یواش پا بِکشی
ریسریِ گلِ مَه نِه اِگُشی
مَجمه گهپ دلو،گَوه زیده اِز دیر
جُورِ شَمی منِ اَوی " دَرِکل " ای خندس
دَورولاس رصق اِکِی آساره
جُوه شَه ی شَو اَقس دیرست
تیل تیلک صُوی زی
جُور تیل پمبه ای ای وَی اِز دیر
بالِ چاله دَم صُو،تَرکی دیمه "غُراو"
قهقه کوگ دِر اِی خورد وِ مال
غُف گل زَیده وِدَر زیر بُهون
تیه تریاکی وُ خَو
پَل نَگُو ،یَه لِکِ چندارِ سیا
خَورده اَو کُندر و عَمبر وِ صَوق
لَو دهونس اِی گُوی
خینِ کوگی یِه بِریسسته وِ بَرف
سی وُ سه دِندونس
بِسدن زیدنِ واکِل وِ رقات
یا هِدن تیله خرگوش کِه خَف کردِ وِ ترس
تَلگِ سینس تَور صاف وُ هَلیکِ " دُورا"
جُورِ کارون هُو نداره یَه لُفی
دَوُوِ گُنگ بیاوون وِ جِلَو
وُوُی پیرست وِ خَو
مِنِ گرما رِیتو ،کوگِ دِلم.

#خرم_سعیدی بهار۹۸




نوع مطلب :
برچسب ها : خوپلا، شعر خرم سعید، شعر بختیاری خرم سعیدی، شعر محلی بختیاری، شعر نو لری،
لینک های مرتبط :
یکشنبه 14 مرداد 1397 :: خرم سعیدی
" اَو بَرَک "

اُو سُو کِه آساریَل بیدن خَو
"شاوانو" دُودَرِ یَه دُونه مال
خُوسِ تَک بی وُ یَه مَه کِه گَوه زَی دَورِس
شاوِشایَک بِنِشَسِه سَرِ اَو .
پاپتی بال چَشمه
پا کِه اِینا وُ اِورداشت سَرِ گِل
گُل اِی دروَید وِ جاس
تا اِخَندس ، هَمُو گُمپ گُلس تیف اِی زَی
بُوِ خَندس دَرِ عَرطِس اِگُشی
کُلتِجَم خاک ولات، بُو خُوشِ اُو اِی دا
اَوِ چَشمه هَی اِتُورِست سَرِ کیف
رَنگ وُ ریِ هُونِه کِی دی منِ اَو
زَنگُلِ باد اِجُمنی همه جا حرفِ هُوبی
بُوندِیَل کِل اِی زَین
پِرپِروک دَور گلِ میناس اِی گشت
آساره رُهِ دیر
نَشمیِ ریِ هُو نی بُرد وِ ویر
لَچک الماس نماسِ اِی دی
گُلِ نوراس فرشنا، بُو اِنان مینِ چَکِس
آسمون خیفیِ هُونه کِه اِدی، شَرم اِی کِی
لِکِ اَورِ بِکشی ری تَپِ تیلونِس وُ خُوس...
دَس زَنُم ریم وُ اِگُوم وُوی تُوَه
پَیِ بیتا وُ چیا دی اِدَوِستیم وِ کیف
شَو کِه وَی ،کَه دیِ خَو
دَسِ نا ، نا همه مُون
مِنِ کُهرنگ، سَرِ رَه اَونِ گِریدن، اَمداد
خینِ سَوزی کِه اِبُردک "کارون"
تا گِرن جُون رَگ و پیوندامون
وا تَوَر زَیدن وُ رُمنینِِ کُهِ وُر مِنِ رَهس
اَوِ گِل کِردن وُ ماهی اِگِرن
مِنِ کِفتِ بِگِرین
غارتی اجدادی،دِربِدین وُر مِنِ مال
اَونِ جَرنین شُتِ زیری،بِرَسُونه خُوسه جَلد
گرمسیر تِشنه تَر اَز ایلاقِ
شاوانو ، دُودَرِ مال،لیک بِزَن دَس بِزِ ری
جُورِ " تَمتی " "گُلگیس " تُو بِکن ایلِ خَور
 
#خرم_سعیدی تابستان۹۷ خورشیدی

Ayapir2.ir
Telegram.me/khorram_saeedi




نوع مطلب :
برچسب ها : شعر نو لری بختیاری، شعر نو بختیاری، شعر نو لری، خرم سعیدی او برک، شعر نیمایی بختیاری،
لینک های مرتبط :
پنجشنبه 11 مرداد 1397 :: خرم سعیدی
" دویتی مال "
میشکال مال،یو چن رُو یَه دَنر
کُلهِ نادِ پَسِ بُرگ وُ وِ کیف
هُف منِ ساز اِکُنه
مُقُمِ " سرناز وُ گُلناز" اِزَنه .
گَلِ گُل، مینِ گُلِسونِ گلای کِلِ مال
اِوارازنین خُوسُون، جُورِ بهار
رَنگ وُ ری چی رُوِ نُور
کد و بالا،لِکِ چنداری خَیف
لُچک اُلماس نما، اُردی ارشفیا وُرمِنِ تیگ
جُورِ کوگ پُور،اِتَپن یا کِه وِ دَو بال اِزَنِن
مَیناییِ دُو سِه لُو وَروَنده
بَن سیزَن وِ رقات
دِلرُوا مُهره ی منجاس،دِل اِی بُورد وِ دیر
گُوِ دَسمال،شُراوِه دُو طرف
مُهره شَو تَو،مِنِ ناوَنده وِ نا
سینه ریزا پُرِ میخک هِد وُ عَمبَر بُوِ خُو
بایی بَند بَسِه وِ بایی چَپِس
چند تا مهره تیه،سوز مهره،دُو سِه تا قُرِ کُچیرِ نُرقه
دُو تا دَس،لِشگِ دِرَهد،بایم پُر گُل وِ بهار
سَوز وُ سیر دسمالا،وِ زِرِن قِرقِرِشا مینِ هوا
قِرِ شَولار قِری،تَهنه اِی زَی وِ هَمُو کوگِ دَری
بِسِدِ دِندونا،تا زَنِه کِل،مِثِ برف بِرچ اِزَنه
شَپَک اِی زَین دُورگَل وُ اِهَی گُل خُونِن
مَه گَوِه زَیده هِدن دَورِ بَهیگ مِنِ مال...

#خرم_سعیدی تابستان ۹۷ خورشیدی
Ayapir2.ir

Telegram.me/khorram_saeedi




نوع مطلب :
برچسب ها : شعر نو محلی بختیاری، شعر نو لری بختیاری، شعر نو لری، دویتی مال، خرم سعیدی،
لینک های مرتبط :
شنبه 16 تیر 1397 :: خرم سعیدی
" صُوِ مال "

بُرگِ شَو جُورِ کُهی پیر، پُرِ تیگ کُرَو
مِنِ آسُونه گِلیس، تش وُ برق زیده و در
خط خطی وُ خَل وُ چَل،منِ سینه آسمون رَه ای رَه
پیش زی کِه افتو،بِدراهه منِ نافِ هو کئو پیر وِ دیر
نِشتِ نُور رَگ رَگی وُ ری بالا،پَنگ ای وند منِ ری اَورا
نَرمه باد پا سِوِک اَورانِ بِروندک جَلدی
تند وُ تند وَند خَورِ سال خشینه منِ مال
مُور جلال بیله بیگ
مینِ ای مَخملِ مَرغ،جَم وُ جُورن کلِ یک
گله چارپا منِ مَرغ هی اِچَرن
یَه دنر دینِ دِر ایدن،دَورِ پُشتِ رُونا
کیونومال،کچِه پُر خال وُ مُدام دَس وِ کار
تینِمِد وّند وُ نها بالش گئپی وِ سَرس
گَپِ مال شاهُونه زَیده تِکی
مَقَلِ وَرشو وُ قُوری شانشون بَست خَورده
جَعوه زارپیشه نهاده وِ وَرس
مَجمه زیر مَقَلِ هُو،مِثِ مَه لِرک ای زَی
استکانانِ نهانِ منِ لَبتَخت قشنگ
دِشلِمه قند سِبید " مَردَشتی"
عَرطِ چُوی تازه دَمِ " کلکته" ،پیتستِ وِ مال
اما مَیلتُون نَکشا ای گَویل
چَپِه نُون تیریِ گرم، بنهاده وِ طَوَق
تُوِ شیر،کرهِ گوسِند وُ یه پاله پُرِ ماست
عاسلِ کُه پُرِ فنجون،خایه ریز کوگ چالِه
ضَئف قیلونِ پیا آماده.
حُقه بافُور،تِکی داده وِ قوری کِلِ تَش
یَه نُخود تَحلی،اِدیسنی کِرِ سیلای حُقه
یَه گُلُو تَش گَمِ مَقاش اِبِلیوست وِ دیر
بادِ مِن پُف، جَم اکی مینِ گُلُپ
نُرقه کُو ساق بافور،بنهاده گُرِ لَو،هُف ای کی
سَرِ اَنگِشت رَسی سَر تحلی وُ بِچِرنی تَهِ دل
یَه دنر دینه قِلیسنید هَمس
وِ سُکُل نِفت یواش،هُونه ای داد وِ در
دِشلِمه قند بِزی من کُپ وُ نادس گُرِ لَو ای مِتِنی
یادِ بیت مَرحومِ " داراو" وَسُم 
" کُر دونگ مده،دولت وُ دنیا وِ خومونه" ایچو

#خرم_سعیدی تابستان ۹۷ خورشیدی

Ayapir2.ir

Telegram.me/khorram_saeedi




نوع مطلب :
برچسب ها : شعرنو محلی بختیاری، شعر نو لری، شعر نو لری بختیاری، شعر نو بختیاری، خرم سعیدی، صو مال،
لینک های مرتبط :
سه شنبه 5 تیر 1397 :: خرم سعیدی

" پیار دل کارون "

غُروفُون کِی
سی دلِ دَی بلال
کارونِ گِرفگارِ گَژدیمِ عذاوِ روزگار
خَرس ماسس تیس
گژگُپِ گَپ سر دِلِس
وختی صدا شُرنگ شُرنگ بلال اشنه
تش اُفته گوشه پیار جیرس .
روزگار شیم
وا بُضغ گِلی گِر
جُلِ جدائی وَندِ وِ کُول کِنار
پرده دُرشتِ لَتی،
وا تَئمره کشی میون مون .
ملای جاوری خط چپ دار
سَر کتاوس ورداشت
سر تکون دا و بگو:
بد شگونی و شیمی زمون
نی پاهه چند دَمونِ دی
من ای دیار
اَر گوگری اَوه بیار
دَسا گِرمُست اَون
حُونه شَوِ وَتِوَر، ورکنه
چارچو هونه و کول کشن
افتو زلال زنه نِسه
#خرم_سعیدی تابستان۹۷ خورشیدی




نوع مطلب :
برچسب ها : شعر نو لری، سعر نو بختیاری، شعر نو لری بختیاری، پیار دل کارون، خرم سعیدی،
لینک های مرتبط :
چهارشنبه 9 خرداد 1397 :: خرم سعیدی
" دل دردی "
پیر دِرَهدی تَکِ تک
شاخ وُ بَلگِس بِتَکس،سرِ اَنگُست یکی دالو کُر مُرده اَوی
خُوس تَینا سر یه پا واسا، وِ کسی تِکه نَدا
پُر سَرس چال قلا
کِه ایارن همه شو شیم خور
یکی سون دوش اگو:
چقذر مین زمون وُ دَورون،لیش لیشِ وُ پِلشت
سَگَلِ مال اگوی، پر دهون سون هد ماست
سِیَلِ دَور نها،دُز میر جریت اِکی پا من مال بِنا
پاس اکردن دزِ ای بی رسوا
دُزِ ای دَور وُ زمون،شیک وُ پیک پوشه که تا
سُول گِمونی نبره گفتر ایل
گَل گَلِن جُور تَریده شَو وُ رُو
دَکل چَه کن نفتی و دَلو
تا وِ یَه سیزن کُت کنده هنو نی کنه رئم
هو وِ دین "رانت"و "دلار" هید و "زمین خواره" اوی.
تَئل تُرش اَر بیوه اَوقاتُم
هر چه قارقار اِکُنم بال اِزنم
نید حَرضَتِ سُلیمو بُوَره رَه وِ دلم
گَه گُداری جَقَلل مال ایان
بَردِلُون مُون اِکُنن تا فِر اِدیم
رَه بُریم ری وِ کُه وُ وَشت اِنیم
کُه سر ناده مِن گوش اَورا
کهخدا زاده،تکی داده وِ بالشتِ زمون
هی نیره اَوِ رُو رَه اِره
اُو گِلالِ کِرِ دَسس پُر بَرد
سَر وُ سُنگال وُ گُلالِس اسبید
برف هفتاد زمسون ،هُو قوا تازه وَرس
آساره سَرِ کُه سَر اِدُزی
نرمه نور دَم صو، ریِ برف برچ اِی زَی
کِرِ کُولِ اِشکفت، شُونِ گَله سَرِ ناده هُو وُ خُور کِرده وِ خَو
گله من قاش وِلو
هاشو وُ دال سَر مال وِ دَو
کُور کُورک کُنه خَو
بُوَره جیجه یتیم پَر مال .

 #خرم_سعیدی بهار ۹۷ خورشیدی

Telegram.me/khorram_saeedi
Ayapir2.ir




نوع مطلب :
برچسب ها : شعر نو لری، شعرنو محلی بختیاری، شعر نو بختیاری، دل دردی، خرم سعیدی،
لینک های مرتبط :
جمعه 14 اردیبهشت 1397 :: خرم سعیدی
" مُنُو دل "
مِن بهاری کِه همه هاچق اِبُون
خُومِ تَک مَندم وُ پاهیز دلم
هیچ مَندیرِ کسی نیم، کِه بِگُوسیم " آخَی "
مُو دلم ایخُو کِه تا، بِقِلیپُم منِ تاریکی دل
رَهِ پاکی بُوُرُم
دل مو تنگ اَویده سی خُوس
مَنِشینین کِلِ یُو، وُ بِدین دلداریس
گفت وُ لُفت خُونِه هِلین سی یه دَمُون دی ایسا
دلِ مُو پُرِ پُرس، شادی وُ ناشادی هید
خُومِ تُک مّندم وُ دنیای دلم
کِه کُرور تا وِ کُرور،هَوَس وُ دادن دل لیش وُ دُرو، هُو اِی اَرزِه خُوسِ تّک
خُوم تّک هیدم وُ تینای دلم
کِه پُرِس هید قشنگی وُ بّفا، یَه رنگی
تُنه دادم وِ هَمُو  " پیر مَهمی "
نَپِرُونین خَشیِ دلِ مُونه وا یَه " پِخی "

#خرم_سعیدی . بهار۹۷ خورشیدی
@khorran_saeedi
ayapir2.ir




نوع مطلب :
برچسب ها : مُنو دل، شعر نو لری، شعر نو بختیاری، شعر نو لری بختیاری، خرم سعیدی،
لینک های مرتبط :
یکشنبه 26 فروردین 1397 :: خرم سعیدی
" پیر برف "

گُودِ بی گَفترِ مال
بئدِ شَستُم وِ زِمِسُون رَهده
یَه نَفس خُو اِ کشه،دَمِ سَرمانه اِبَنده وِ زِمین
اما امسال،پسِ هفتادم،آسمون باز زایی
برف چی چوقایی،مُلِشُون کُه نِه بِپوشوند وِ نُو
لِشگِ حُشک ،سر وِ هوا
چی قوا شِره دِره، وِ وَرِس اِز کرباس
مِنِ ری بِرچ اِی زَی،نور چی دَوریِ وَرشَو اِز دیر
بادِ لیله،وختی،پَره نازک برف،جورِ مینای یَه لُو دِر اِیدا
تیزی ای سرما،نُک وُ نُول آدمونه ای رچنی
چَشمه از او بالا،خُسه زَیده وِ َدرِ بی قَیتی
شیت وُ شات هی اکُنه رَه ای رِه
شُونِ گله،گلسه کی منِ اِشکفت وِ جا
گُوسیل، خُونّه اِتَینیدن جَلد
نَم وُ نُول دانِ سرِ گئر اِشکفت
تش وُ تُنگی درِ اِشکفت نهادن واکار
پَریُون، کتریِ من تُربِه دِرِیرد
برف پُر کی وُ نهادس سرِ تش
اگُم، میلتُون نَکشِه چُوی دَم کی
میشِ کُر چال، اِخَوسی وُ وِریسا سرِ پا
یَه بره نَر هُو بِزایی،بره کُر شَه وُ قَشی
پشم کوتا وُ هَمس فِرفِریِ با داده
شُون نیشت وُ هُونه دی کیف ای کی
بسم الا گرگ بگود
پالهِ اَوخُوری اِز تُربه دِرِیرد،گُونِ میشِ گری شیرِ جِک دُود پُرس
بال تَش بَردکیِ ناد وِکار
شَوکُله نه کِلِ بُورگا تَمنی،
دس کی گوشه نمِد،نَینِه دِرِیرد
سرِ کیف هُف من نی شیتس کرد
گلِ گیسِ هُو اِخُوند سی گُلِ مال.

#خُرم_سعیدی -بهار 97 خورشیدی
 Ayapir2.ir
telegram.me/khorram_saeedi




نوع مطلب :
برچسب ها : پیر برف، شعر لری بختیاری، شعر نو لری بختیاری، خرم سعیدی، شعر نو لری،
لینک های مرتبط :
دوشنبه 20 فروردین 1397 :: خرم سعیدی
" بیداد خونی "

ماتِه سَر زَی دَمِ صُو
ضَف قیلون، پا بَنِه ناد بُنا
جیتِ مَشک سَوزِ گِری وُ قَلادَریز کِی
داسِ وَرداشت وُ سُوهُونِ غَمِس وِس بِکشی
بادِ چَپ، گرمای ریتَون وُ هَمو غُولِ دِرو
یادِ سَوگُل کِه وِ سَرحَد اِزنه ناشتا دُو
بافِه بافِه غَمِ سَرد،سَر دِلِس پا اِی نا
گرمسیری سُرُوی وا نَمِ دل سَر اِی دا
"ای بی داد هَی"
" یَکین اِی خواسُم بی دادی سیم بِخُونه"
"بِکنه خارِ دِلُم- ای بی دادم هی- جاس گُل بِنِشُونه"

#خُرم_سعیدی بهار ۹۷ خورشیدی

Ayapir2.ir
Telegram.me/khorram_saeedi




نوع مطلب :
برچسب ها : شعر نو لری، شعر نو لری بختیاری، شعرنو بختیاری، بی داد خونی، خرم سعیدی،
لینک های مرتبط :
پنجشنبه 10 اسفند 1396 :: خرم سعیدی
«منیدیرِ دیری»

تا کِه هُو دیر ایا، چی بارون
مهِ غم سر ای نا،سر دلِ اَورِ سیا
کُهنه زَهمِ سر دل،سر واکی
پَرُو اِی زَی سرِ هَرُوِ تیه
زَئم زَوونِ ای خرس
سرِ نادِ سرِ شُون تیتُم رَه
تُرِزیری اِی رَه .
بی کسی و تینا
چُنُو هیدیم کِه تا،سایه بام نِخوره با
چی دِرهدی وِ پهیز
کُلک وُ پَر رهده هدیم بی شَولیز
شوق اَیه مَندِ وِ دل،چی  کوگ شوق
اُو طرف تر زیچو،تَش وُ چاله وا سیخ،هِد مندیر .

#خرم_سعیدی زمستان۹۶ خورشیدی

Ayapir2.ir
Telegram.me/khorram_saeedi




نوع مطلب :
برچسب ها : مندیر دیر، خرم سعیدی، شعر نو لری، سعر نو بختیاری، شعر نیمایی بختیاری،
لینک های مرتبط :
جمعه 28 مهر 1396 :: خرم سعیدی
" مَلکِمیت "

اَی بَرد شیر
دل دِه وِ مَتلم
مُو بَلگ زرد بلیطم
وا نم نم پُئیز
چی دال مندیرمه
خَلکن خَچه آسمون .
جیکِشتم،مین بلگ اور
وا تیغشت افتو وِ رُه کُه
چی بِنگشتی کِه بِوینه مار بَچَلس خُوره
سی تَریده ستمی کِه چی اَو رَوونه
وِ دیر ایا .

#خرم_سعیدی پاییز ۹۶ خورشیدی
 Ayapir2.ir




نوع مطلب :
برچسب ها : خرم سعیدی، شعر نو لری، شعر نو لری بختیاری، شعر نو بختیاری،
لینک های مرتبط :
شنبه 18 شهریور 1396 :: خرم سعیدی
" شُون وُ شَو "

غیرزا ویقه ککاونگی و دیر
درنگشتی نبی
دَس وُ پا اَفتو وِ پِخو
زیر بهون آسمون اسیر .
مَه وارازنیده وِ فیس
چی بهیگ،پا سر آسمون نها
تَوِه زنگ خورد آسمون پرس تِنَه .
اُردی لشکر شو
جُور هَفی دُهونِس واز سی خَوردن
اِی گُوی ملایِ مال
طلسمس کرده قَدِ بَرد.
شُون گله بال قاش
نی شیتس گُر لو
بیتا " آ داراو" خوند و درد
" چطو نفتانه بردن،چطو حق مونه خوردن"
" یُو روخونه طلاهه"
" من ملکای ایما،شو و رو ادراهه"
" اویه جور لیره،اما صحاو ای او"
"و تشنهی امیره..."
داد و قال وس و مال
گله گرگی اوی...

#خُرم_سعیدی تابستان۹۶ خورشیدی

Ayapir2.ir




نوع مطلب :
برچسب ها : خرم سعیدی، شعر نو بختیاری، شعر نو لری بختیاری، شعر نو لری، شعر نو محلی بختیاری، شعرنو محلی لری،
لینک های مرتبط :
جمعه 27 مرداد 1396 :: خرم سعیدی
" بی قَیتی "

آسمون زِندونی،بُرگلِس وُرمِنِ یَک
نیمدریس ری مرگ واز
اَفتوس کِز کِرده،وِ پَسِ کُهِ سیاهی اِز ترس
مَه پَنه بُردهِ پَسِ ، کــَرهِ چیری تینا
دُونِ نورِس مِنِ حُورس جَم بی
داسِ زَنگ زنگیه وِر دا وِ پَسِ تاپُو حُشک
کِشتِ کالِ شَونِ،پُک کُلُو خورده وِ کُل.
سَوزه پا دَس وُ دِلس هِد نامید
هَی غِرمنه وُ کُنه تُف نَعلت وی دَورون
زَحم کاری،ریِ کاردیم دلس جا خُش کی
نالِه هَی تُک اِکُنه اِز تیلس
جُور شَم هَی اَو اِبُو
تَکُلی،تاپُو وُ دَرفاس،پَتی اِز قیت هِدن
وِ گِمونم هَمی اَمروز صوا،هُو غُروفون اِکنه.
اُو طرف ارباوِ بی قَیت نِشَسه سرِ فیس
کیفسُون کُک،بال مَقل قُوریِ نادریس وا بافُور
کُلِ حُوراس پُرِ غَله وُ گَلس چاق وُ چِله
رَنگ وُ ری سُرفه هُو،خین دل بَزگرسه یا شُونه.

#خُرم_سعیدی تابستان۹۶
Ayapir2.ir




نوع مطلب :
برچسب ها : خرم سعیدی، شعر نو لری، شعرنو بختیاری، شعرنو لری بختیاری، بی قیتی، شعر نیمایی بختیاری، شعر نیمایی لری،
لینک های مرتبط :
دوشنبه 23 مرداد 1396 :: خرم سعیدی
" مَندیرِ نُور "

چُوپونِ آسمون
گله سه هَی کِی وِ شَوچَری
مِن بِکال اَو
چِرای بهون آسمون بِلیوست
پَلِ بُورس،زلف بهیگی وِ پیچ وُ تَو
خنجر فیروزهی بُرگس
دیوار وِ دیوار نور
دسس گردن دوای شو
مهتوِ وِ خو
زیر سایه چرتول آسمون
گو یو نشینیم مندیر رُوشناس.

#خُرم_سعیدی تابستان۹۶
Ayapir2.ir




نوع مطلب :
برچسب ها : خرم سعیدی، شعر نو لری بختیاری، شعر نو لری، شعر نیمایی بختیاری، مندیر نور،
لینک های مرتبط :
سه شنبه 20 تیر 1396 :: خرم سعیدی
خرم سعیدی:
" چرای وَر باد "

اسبِ سیا "سیاوش"
یالسِ باد اَوشُوند
رکاوس پتی
سرس وِ زیر اِی شِهنی وُ دس اِی زَی.
"فرنگس"،سرو خُوند وُ ری بِکند وُ پَل بُری
شَو،حِقه بِشرنی 
مِه ی رَموک،مین اَوِ آسمون وِ دَو
پسِ هَف کُه اَور قام اَوی.
گمونُم خروسن سر بُرین
"رُسم" وِ خَو بمند
وای وِ حالِ چرای دَم بادِ ولات
چَند زرده غم وِ کُول وُ تینا.

#خرم_سعیدی تابستان۹۶ خورشیدی

Ayapir2.ir

Telegram.me/khorram_saeedi




نوع مطلب :
برچسب ها : خرم سعیدی، شعرنو بختیاری، شعر نو لری، شعر نو لری بختیاری، چرای ور باد،
لینک های مرتبط :
شنبه 10 تیر 1396 :: خرم سعیدی
خرم سعیدی:
"خَوپلا "
*نوعی شعر گویشی شبیه بحر طویل*

کُهِ لَو تشنه دلِ تنگ وِ گرمای توستون،بنشسته وِ کُپِ چاله صَرا کِه پُرس خارخُلونه کِه تُکه وِ جیرس خین رَوونِ وِ منِ دشت وُ بیاوون.
گَو یَو تُو بِنه بادِ چپی دِر اِخوره دَورِ سَر ایچو،بلند ایبوه چی دیو،تنیره اِکشه،کُور کُنه تیهِ هر کی کِه تیس وازه وُ قُلف ای زنه لوا،کِه وا کور بُوی وِ کَر وُ آرُم بری وُ یای ، مثِ یه کلِ دَهولی کِه یه بِنگشت نَترسه وِ وَرت مینِ زمونه.
تَش وَسه وِ ایچو،تُو اگوی دالوِ پوز بسه نشسته سرِ خَل کرده وُ واگیل جوس باد زَنه تا تشِ چالس بگره جون،وَنه دیلق وُ سُوسه کلِ ای دار وُ درهدای ولاته،گهِ گاهی،دیِ ای چاله اِره مینِ تیس سُور ابو خَرس اریزه،کنه نرفین وُ اکفنه،وُ هی سینه کُوِه،غُر ازنه کِه،کُر یاین بنیرین یُو چه روزیه کِه چی شَوِ سیاهه،همس آلیده،نفس گِر، وریسه وِ سرِ پا وُ اغارنه: هالو مُو دلم خینه وِ ای کهنه ولاتا کِه پرس نکبت و شیمه شوِ شهی منِ پوزانه گریده،کی دیده بهاری علفس شه بوه،ای گوی کِه بخونده ککاونگی وِ سرِ هر شُکه بُرگی منِ ای مِلک ، و یا رِهدنه خاک آدمِ مُرده وِ منِ  هُو،که رُومسته سرِ یک،شَوس اِز روز بتر، روز وِ شو لیشتره ایچو.... فیچم مُو وِ خو باز تیه دِونم خُومِ تک بینم و تینا،سرم اینم مث دیه  وُ اخوسم.

#خرم_سعیدی تابستان۹۶خورشیدی

Ayapir2.ir

Telegram.me/khorram_saeedi




نوع مطلب :
برچسب ها : خرم سعیدی، شعر لری، شعر بختیاری، شعر نو لری، شعر نو بختیاری، نوعی بحر طویل بختیاری،
لینک های مرتبط :
یکشنبه 27 فروردین 1396 :: خرم سعیدی

« بٙردی دل »

دٙروازه تیا کالس واز

خٙرسس جُورِ جُوِ بهار

وِ هُونه بی درِ دلس دٙر اِی زٙی

اما دلِ کاردیم وِ کُولِ مُو

زیرِ چٙرتِ هٙف لا سینم مٙند

تا سٙیلوِ خٙرس وُ تٙش وُ برق سینس
وِ رٙو بِرن.

#خُرم_سعیدی
Ayapir2.ir
Telegram.me/khorram_saeedi




نوع مطلب :
برچسب ها : خرم سعیدی، بردی دل، شعر نو لری، شعر نو محلی بختیاری،
لینک های مرتبط :
جمعه 20 اسفند 1395 :: خرم سعیدی

« مال چواسه »

جُورِ بازبازک اِبازن شِو وُ رُو
آسمون واز وُ فراق
شٙوِ پر رازِ نهاده سٙرِ شُون
جُورِ « هرکول» زمون.
دیِ شو بال اِگُشه
یابو آسارنه بٙسه سرِ سٙرد آخورِ کُه
لچک الماس نما نادِ وِ سر اِی دٙونه
شٙوکُله مٙه نِه نهاده گُر سر فیس اِکُنه
وا لِورگ باد صٙوق
گرگ لُوق ناد وِ دٙو
غولِ سایه وِ شتاو ای ورگشت
کاکونگ زیر شُکه
داغ دل ایخونه
یُو چِه مالیه دیه
کِه چنو دٙمبٙرده
همه چیس هید چواسه ایچو
ظلمونی بگریسونِ وِ چی «اسکندر»

#خُرم_سعیدی ۹۵خورشیدی
Telegram.me/khorram_saeedi




نوع مطلب :
برچسب ها : خرم سعیدی، شعر نو لری بختیاری، شعر نو بختیاری، شعر نو لری، مال چواسه،
لینک های مرتبط :


( کل صفحات : 3 )    1   2   3   



مدیر وبلاگ : خرم سعیدی
نویسندگان
نظرسنجی
نقد و بر رسی توسط بازدید کنندگان محترم








آمار وبلاگ
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :