تبلیغات
آیاپیر (خرم سعیدی ) - شعر بختیاری - شعر فارسی - مطالب ابر شعرنو محلی بختیاری
 
آیاپیر (خرم سعیدی ) - شعر بختیاری - شعر فارسی
فرهنگ و ادبیات بختیاری
یکشنبه 7 مرداد 1397 :: خرم سعیدی
" کُرَو "

زُلُوی کُهنه بِنا پیشِ بهُون
تیگِ بَسه هُو وِ دَسمالِ شَدِه
سرِ ری کاسه زُونی بنها
هُنُونِه جورِ عزیزی بِگِریده وِ بغل
مَهِ ریس لک لکی وُ نَم کشیده کهِ زَرد
مینِ هَرشتِ جَوونی بِتَکِسته نَینی
لَو کوو حُشک وُ تَفل
اِگُوهی تَپ تَپو وُ تاسه گریدن ناسه
خین جیر هید چنو کِه
تُهم غم زیدنه شُوم سر جیرس
یا خاک انداز هُلِ داغ
سُولِه کِردن بُنِ ناس
دل و دَسس دیه واس نی خوره با
هی سُرو خُونه وِ دیندا و نهاس
کُروِ مینِ دلس چینکه پُوکِست
دَس وِی کاردِ دری
زیر مینا گیلِ پَل خُوس بِگری
بُوُریدس وُ بنادس سر گورِ آرمونای دلس

#خرم_سعیدی تابستان۹۷ خورشیدی

Ayapir2.ir

Telegram.me/khorram_saeedi




نوع مطلب :
برچسب ها : سعر نو لری، شعر نو لری بختیاری، شعرنو محلی لری، شعرنو محلی بختیاری، کرو، خرم سعیدی،
لینک های مرتبط :
شنبه 16 تیر 1397 :: خرم سعیدی
" صُوِ مال "

بُرگِ شَو جُورِ کُهی پیر، پُرِ تیگ کُرَو
مِنِ آسُونه گِلیس، تش وُ برق زیده و در
خط خطی وُ خَل وُ چَل،منِ سینه آسمون رَه ای رَه
پیش زی کِه افتو،بِدراهه منِ نافِ هو کئو پیر وِ دیر
نِشتِ نُور رَگ رَگی وُ ری بالا،پَنگ ای وند منِ ری اَورا
نَرمه باد پا سِوِک اَورانِ بِروندک جَلدی
تند وُ تند وَند خَورِ سال خشینه منِ مال
مُور جلال بیله بیگ
مینِ ای مَخملِ مَرغ،جَم وُ جُورن کلِ یک
گله چارپا منِ مَرغ هی اِچَرن
یَه دنر دینِ دِر ایدن،دَورِ پُشتِ رُونا
کیونومال،کچِه پُر خال وُ مُدام دَس وِ کار
تینِمِد وّند وُ نها بالش گئپی وِ سَرس
گَپِ مال شاهُونه زَیده تِکی
مَقَلِ وَرشو وُ قُوری شانشون بَست خَورده
جَعوه زارپیشه نهاده وِ وَرس
مَجمه زیر مَقَلِ هُو،مِثِ مَه لِرک ای زَی
استکانانِ نهانِ منِ لَبتَخت قشنگ
دِشلِمه قند سِبید " مَردَشتی"
عَرطِ چُوی تازه دَمِ " کلکته" ،پیتستِ وِ مال
اما مَیلتُون نَکشا ای گَویل
چَپِه نُون تیریِ گرم، بنهاده وِ طَوَق
تُوِ شیر،کرهِ گوسِند وُ یه پاله پُرِ ماست
عاسلِ کُه پُرِ فنجون،خایه ریز کوگ چالِه
ضَئف قیلونِ پیا آماده.
حُقه بافُور،تِکی داده وِ قوری کِلِ تَش
یَه نُخود تَحلی،اِدیسنی کِرِ سیلای حُقه
یَه گُلُو تَش گَمِ مَقاش اِبِلیوست وِ دیر
بادِ مِن پُف، جَم اکی مینِ گُلُپ
نُرقه کُو ساق بافور،بنهاده گُرِ لَو،هُف ای کی
سَرِ اَنگِشت رَسی سَر تحلی وُ بِچِرنی تَهِ دل
یَه دنر دینه قِلیسنید هَمس
وِ سُکُل نِفت یواش،هُونه ای داد وِ در
دِشلِمه قند بِزی من کُپ وُ نادس گُرِ لَو ای مِتِنی
یادِ بیت مَرحومِ " داراو" وَسُم 
" کُر دونگ مده،دولت وُ دنیا وِ خومونه" ایچو

#خرم_سعیدی تابستان ۹۷ خورشیدی

Ayapir2.ir

Telegram.me/khorram_saeedi




نوع مطلب :
برچسب ها : شعرنو محلی بختیاری، شعر نو لری، شعر نو لری بختیاری، شعر نو بختیاری، خرم سعیدی، صو مال،
لینک های مرتبط :
چهارشنبه 9 خرداد 1397 :: خرم سعیدی
" دل دردی "
پیر دِرَهدی تَکِ تک
شاخ وُ بَلگِس بِتَکس،سرِ اَنگُست یکی دالو کُر مُرده اَوی
خُوس تَینا سر یه پا واسا، وِ کسی تِکه نَدا
پُر سَرس چال قلا
کِه ایارن همه شو شیم خور
یکی سون دوش اگو:
چقذر مین زمون وُ دَورون،لیش لیشِ وُ پِلشت
سَگَلِ مال اگوی، پر دهون سون هد ماست
سِیَلِ دَور نها،دُز میر جریت اِکی پا من مال بِنا
پاس اکردن دزِ ای بی رسوا
دُزِ ای دَور وُ زمون،شیک وُ پیک پوشه که تا
سُول گِمونی نبره گفتر ایل
گَل گَلِن جُور تَریده شَو وُ رُو
دَکل چَه کن نفتی و دَلو
تا وِ یَه سیزن کُت کنده هنو نی کنه رئم
هو وِ دین "رانت"و "دلار" هید و "زمین خواره" اوی.
تَئل تُرش اَر بیوه اَوقاتُم
هر چه قارقار اِکُنم بال اِزنم
نید حَرضَتِ سُلیمو بُوَره رَه وِ دلم
گَه گُداری جَقَلل مال ایان
بَردِلُون مُون اِکُنن تا فِر اِدیم
رَه بُریم ری وِ کُه وُ وَشت اِنیم
کُه سر ناده مِن گوش اَورا
کهخدا زاده،تکی داده وِ بالشتِ زمون
هی نیره اَوِ رُو رَه اِره
اُو گِلالِ کِرِ دَسس پُر بَرد
سَر وُ سُنگال وُ گُلالِس اسبید
برف هفتاد زمسون ،هُو قوا تازه وَرس
آساره سَرِ کُه سَر اِدُزی
نرمه نور دَم صو، ریِ برف برچ اِی زَی
کِرِ کُولِ اِشکفت، شُونِ گَله سَرِ ناده هُو وُ خُور کِرده وِ خَو
گله من قاش وِلو
هاشو وُ دال سَر مال وِ دَو
کُور کُورک کُنه خَو
بُوَره جیجه یتیم پَر مال .

 #خرم_سعیدی بهار ۹۷ خورشیدی

Telegram.me/khorram_saeedi
Ayapir2.ir




نوع مطلب :
برچسب ها : شعر نو لری، شعرنو محلی بختیاری، شعر نو بختیاری، دل دردی، خرم سعیدی،
لینک های مرتبط :
سه شنبه 17 آذر 1394 :: خرم سعیدی
" شا مونگشت "

تیغشت افتو ششت
زلف شلال شا مونگشت تشنی بلوری
حوله اور سبیدی دس آسمون
بیوی شولارغری صو وارازنیده
مینا سه لو ورونده
ناوندینه میخكی و نا
مهره دلروا مینجا
لچك الماس نما،بَن سیزن ارشفی
و خذمت واسا.
اِستئل روشن آسمون
دنیا منس دیار .
گلا،بی غم پهیز زیر گچل و خو .
دی چه زغالی مین تیه آسمون
پیای زغال پا
وا بار پیری و تی نمد سیا و خو .
اورزگهی نسه سار خونه
او حرمو برفتونشین ادا جواو:
" شرمت ای بو مر و شو تا یای و در"
"تو بكن فرگی بزا ی شئر نر"
" دی بیو مردی كن افتونه بزا"
" تا كه تاریكی بره واپس نیا"
سختیا وا ای زمسون رن و در" 
"ری سیائی مهنه وس بی دردسر"
" ای دفه تیخی من لتی درار"
" شو بره وابو وته ور شرم سار"
" مو گمونم كه تو بیوی قاولی"
" افتو ار وردی عزیز من دلی"
تا خواس بده جواو
آسمون شیوست
" جفرجنی" اوی
صدا خوندگر بری.
" خرم سعیدی پاییز٩٤"




نوع مطلب :
برچسب ها : شعر نو بختیاری، شعرنو محلی بختیاری، شعر نو لری بختیاری، شا مونگشت، خرم سعیدی،
لینک های مرتبط :





مدیر وبلاگ : خرم سعیدی
نویسندگان
نظرسنجی
نقد و بر رسی توسط بازدید کنندگان محترم








آمار وبلاگ
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :