تبلیغات
آیاپیر (خرم سعیدی ) - شعر بختیاری - شعر فارسی - مطالب ابر شعر نو بختیاری
 
آیاپیر (خرم سعیدی ) - شعر بختیاری - شعر فارسی
فرهنگ و ادبیات بختیاری
دوشنبه 17 تیر 1398 :: خرم سعیدی
" گُدارِ دل "

مُه وِ رَودگه،کِلاک اِزَی چِرا وِ دَس
دینِ مال زیر شَو اِگَشت
اَفتوِ صَوق وِ گُرگ لُق
کُهنه ریسریِ شَونِ وَرُواند
چَرت لُونِ سَوز سیریِ دِرَهدِ تَئر
سایه سارِ آسمون اَوی
گُل وِ کم طاقتی وِ خرس تی
تَش بلازیی بِکِی
غَم غَریوِ اَویِ رُو
نالِ نالِ شَو وُ رُو
تا نِسَه یِ اُو گُدارِ دل
پاوِپا بِکِی
سی نیشتنِ گُلِ ،ریِ تُولیین .

#خُرم_سعیدی تابستان ۹۸




نوع مطلب :
برچسب ها : شعر نو محلی بختیاری، شعر نو بختیاری، شعر نو لری، خرم سعیدی، گدار دل، خرم سعید،
لینک های مرتبط :
شنبه 8 تیر 1398 :: خرم سعیدی
هار هار هارنک
بَرد وَسِه بَهرمون
مِن گِرده زَمون
دریای هُمدلی،چُورِسته ای دَمون
هار هار هارنک
مُستانِ دین وِیَک
قارنین یَه صدا
اَی صُوِ پاوِما
تُون شیرِ دات وُ اُو اَفتَویِ رُه رُها
#خرم_سعیدی تابستان ۹۸
آزادیِ بِزا، آزادیِ بِزا




نوع مطلب :
برچسب ها : شعر نو بختیاری، شعر نو لری بختیاری، شعر نو لری، خرم سعیدی، هار هار هارنک،
لینک های مرتبط :
دوشنبه 5 فروردین 1398 :: خرم سعیدی
" وِ اَیلاق تا گرمِسئر "

وَختی ویرس بهون سرِ دلم زَنه
هزارون بالِنده غم وِ رُه اِره
کِر کِرِ خنده "اَلهک "وُ "چیوه"،بُو چَویل وُ اَوندول اِده
وَختی خین گرمِ بارونِ گرمِسئر
مِن خَرمن اَور تَش وَنه
مَشک وُ دُو دِلم وا مَلارِ سَوز وُ سیر
دَردِ دِلُمِ چی بُو گُل وا خُوس بَره .
دلم ایخو،
عَرطِ حُنکی صُوِ تَرِکی اَیلاق
بُوَندم وِ تُرنه "تِنوش"
بهارِ بِکُنم مینِ قَیطی تا تازه بِمَنِه
هَرسا دِلس کشی وِ تَوستون ،مُکِشتس بِکُنم.
دِلُم ایخو
چینیگرِ پَلِ "مُنگشت"
سایه لِشگِ بهارِ چی اَورِ دَورِ سَرِ نُو بَزگر
بالا گلالِ حُشک دِلُم واداره
گاشِه لِشگِ حُشگ ویرم
وِ "رواط" تا "مُوردفل" وُ "آسماری"
سر مزارم چُرایی رُوشن کُنن .

#خرم_سعیدی بهار۱۳۹۸ خورشیدی





نوع مطلب :
برچسب ها : شعر نو خرم سعیدی، و ایلاق تا گرمسیر، شعر نو نیمایی بختیاری، شعر نو لری بختیاری، شعر نو بختیاری،
لینک های مرتبط :
پنجشنبه 29 آذر 1397 :: خرم سعیدی
" تار باریک "
" برای،نوجوان یازده ساله  ایذه ای که خود را کشت و دیگر گرسنگان "

خبر کوتاه و رعد آسا
درخت خانه ای افسرد
" حیدر" مرد
چراغ آسمانی شعله ای باز از نفس افتاد
کنار آسمان خونبار
ستاره بی فروغِ خون
نشانیگاه راز آلود
وُ با اندوهِ درد آلودِ مردی همنفس با زندگی یا مرگ
دست فقر ،گلوی آن فقیر افشرد
"حیدر " با عدالت مرد.
همای آرزویش نان
نیاز کور،با آن پرتو سوزان
فرو می ریخت دیوار محبت تا که شد لرزان
کنون آن اشک های نو به نو جوشان
درون مِه و یا آن سر زمین،افسون و افسون بار
" حیدر " با جماعت مرد
چو تیر زندگی از چله اش می جَست
دهان دردمند مادرش می خَست
مهی سرد آسمان پیوند
وُ بال آن دعای مادرش بی استجابت ماند،
برای نان
به جرم تیره بختی،خشمخند زندگی غرید

غلاف خونِ سردی در رگش خشکید
غریو آرزوشان نان
وُ فریاد محبت در تنابی خشک می پیچید
" حیدر" آسمانی مرد
کنون ابر سیاه آسمانِ سوگ اندیشِ دلِ خواهر،برادر،عمه یا دایی
ندارد سود در دوران یلدایی
به مرگ " حیدر " اکنون آسمان کشوری پژمرد
مرگسال شهر " حیدر " مرد
شهر ما شهری ست انسان کُش .
کنون ای گوش خاموشان
زنیدش بند،یا اینکه دهیدش پند
گلبرگ گل بشکسته " حیدر " ها 
در این دنیای وانفسا
چه مظلومانه می میرند " حیدر " ها
#خرم سعیدی پاییز ۹۷
Ayapir2.ir
Telegram.me/khorram/saeedi




نوع مطلب :
برچسب ها : خرم سعید، سعر نو لری، شعر نو لری بختیاری، شعر نو بختیاری، شعر نیمایی خرم سعیدی، تار باریک، خرم سعیدی،
لینک های مرتبط :
یکشنبه 14 مرداد 1397 :: خرم سعیدی
" اَو بَرَک "

اُو سُو کِه آساریَل بیدن خَو
"شاوانو" دُودَرِ یَه دُونه مال
خُوسِ تَک بی وُ یَه مَه کِه گَوه زَی دَورِس
شاوِشایَک بِنِشَسِه سَرِ اَو .
پاپتی بال چَشمه
پا کِه اِینا وُ اِورداشت سَرِ گِل
گُل اِی دروَید وِ جاس
تا اِخَندس ، هَمُو گُمپ گُلس تیف اِی زَی
بُوِ خَندس دَرِ عَرطِس اِگُشی
کُلتِجَم خاک ولات، بُو خُوشِ اُو اِی دا
اَوِ چَشمه هَی اِتُورِست سَرِ کیف
رَنگ وُ ریِ هُونِه کِی دی منِ اَو
زَنگُلِ باد اِجُمنی همه جا حرفِ هُوبی
بُوندِیَل کِل اِی زَین
پِرپِروک دَور گلِ میناس اِی گشت
آساره رُهِ دیر
نَشمیِ ریِ هُو نی بُرد وِ ویر
لَچک الماس نماسِ اِی دی
گُلِ نوراس فرشنا، بُو اِنان مینِ چَکِس
آسمون خیفیِ هُونه کِه اِدی، شَرم اِی کِی
لِکِ اَورِ بِکشی ری تَپِ تیلونِس وُ خُوس...
دَس زَنُم ریم وُ اِگُوم وُوی تُوَه
پَیِ بیتا وُ چیا دی اِدَوِستیم وِ کیف
شَو کِه وَی ،کَه دیِ خَو
دَسِ نا ، نا همه مُون
مِنِ کُهرنگ، سَرِ رَه اَونِ گِریدن، اَمداد
خینِ سَوزی کِه اِبُردک "کارون"
تا گِرن جُون رَگ و پیوندامون
وا تَوَر زَیدن وُ رُمنینِِ کُهِ وُر مِنِ رَهس
اَوِ گِل کِردن وُ ماهی اِگِرن
مِنِ کِفتِ بِگِرین
غارتی اجدادی،دِربِدین وُر مِنِ مال
اَونِ جَرنین شُتِ زیری،بِرَسُونه خُوسه جَلد
گرمسیر تِشنه تَر اَز ایلاقِ
شاوانو ، دُودَرِ مال،لیک بِزَن دَس بِزِ ری
جُورِ " تَمتی " "گُلگیس " تُو بِکن ایلِ خَور
 
#خرم_سعیدی تابستان۹۷ خورشیدی

Ayapir2.ir
Telegram.me/khorram_saeedi




نوع مطلب :
برچسب ها : شعر نو لری بختیاری، شعر نو بختیاری، شعر نو لری، خرم سعیدی او برک، شعر نیمایی بختیاری،
لینک های مرتبط :
شنبه 16 تیر 1397 :: خرم سعیدی
" صُوِ مال "

بُرگِ شَو جُورِ کُهی پیر، پُرِ تیگ کُرَو
مِنِ آسُونه گِلیس، تش وُ برق زیده و در
خط خطی وُ خَل وُ چَل،منِ سینه آسمون رَه ای رَه
پیش زی کِه افتو،بِدراهه منِ نافِ هو کئو پیر وِ دیر
نِشتِ نُور رَگ رَگی وُ ری بالا،پَنگ ای وند منِ ری اَورا
نَرمه باد پا سِوِک اَورانِ بِروندک جَلدی
تند وُ تند وَند خَورِ سال خشینه منِ مال
مُور جلال بیله بیگ
مینِ ای مَخملِ مَرغ،جَم وُ جُورن کلِ یک
گله چارپا منِ مَرغ هی اِچَرن
یَه دنر دینِ دِر ایدن،دَورِ پُشتِ رُونا
کیونومال،کچِه پُر خال وُ مُدام دَس وِ کار
تینِمِد وّند وُ نها بالش گئپی وِ سَرس
گَپِ مال شاهُونه زَیده تِکی
مَقَلِ وَرشو وُ قُوری شانشون بَست خَورده
جَعوه زارپیشه نهاده وِ وَرس
مَجمه زیر مَقَلِ هُو،مِثِ مَه لِرک ای زَی
استکانانِ نهانِ منِ لَبتَخت قشنگ
دِشلِمه قند سِبید " مَردَشتی"
عَرطِ چُوی تازه دَمِ " کلکته" ،پیتستِ وِ مال
اما مَیلتُون نَکشا ای گَویل
چَپِه نُون تیریِ گرم، بنهاده وِ طَوَق
تُوِ شیر،کرهِ گوسِند وُ یه پاله پُرِ ماست
عاسلِ کُه پُرِ فنجون،خایه ریز کوگ چالِه
ضَئف قیلونِ پیا آماده.
حُقه بافُور،تِکی داده وِ قوری کِلِ تَش
یَه نُخود تَحلی،اِدیسنی کِرِ سیلای حُقه
یَه گُلُو تَش گَمِ مَقاش اِبِلیوست وِ دیر
بادِ مِن پُف، جَم اکی مینِ گُلُپ
نُرقه کُو ساق بافور،بنهاده گُرِ لَو،هُف ای کی
سَرِ اَنگِشت رَسی سَر تحلی وُ بِچِرنی تَهِ دل
یَه دنر دینه قِلیسنید هَمس
وِ سُکُل نِفت یواش،هُونه ای داد وِ در
دِشلِمه قند بِزی من کُپ وُ نادس گُرِ لَو ای مِتِنی
یادِ بیت مَرحومِ " داراو" وَسُم 
" کُر دونگ مده،دولت وُ دنیا وِ خومونه" ایچو

#خرم_سعیدی تابستان ۹۷ خورشیدی

Ayapir2.ir

Telegram.me/khorram_saeedi




نوع مطلب :
برچسب ها : شعرنو محلی بختیاری، شعر نو لری، شعر نو لری بختیاری، شعر نو بختیاری، خرم سعیدی، صو مال،
لینک های مرتبط :
چهارشنبه 9 خرداد 1397 :: خرم سعیدی
" دل دردی "
پیر دِرَهدی تَکِ تک
شاخ وُ بَلگِس بِتَکس،سرِ اَنگُست یکی دالو کُر مُرده اَوی
خُوس تَینا سر یه پا واسا، وِ کسی تِکه نَدا
پُر سَرس چال قلا
کِه ایارن همه شو شیم خور
یکی سون دوش اگو:
چقذر مین زمون وُ دَورون،لیش لیشِ وُ پِلشت
سَگَلِ مال اگوی، پر دهون سون هد ماست
سِیَلِ دَور نها،دُز میر جریت اِکی پا من مال بِنا
پاس اکردن دزِ ای بی رسوا
دُزِ ای دَور وُ زمون،شیک وُ پیک پوشه که تا
سُول گِمونی نبره گفتر ایل
گَل گَلِن جُور تَریده شَو وُ رُو
دَکل چَه کن نفتی و دَلو
تا وِ یَه سیزن کُت کنده هنو نی کنه رئم
هو وِ دین "رانت"و "دلار" هید و "زمین خواره" اوی.
تَئل تُرش اَر بیوه اَوقاتُم
هر چه قارقار اِکُنم بال اِزنم
نید حَرضَتِ سُلیمو بُوَره رَه وِ دلم
گَه گُداری جَقَلل مال ایان
بَردِلُون مُون اِکُنن تا فِر اِدیم
رَه بُریم ری وِ کُه وُ وَشت اِنیم
کُه سر ناده مِن گوش اَورا
کهخدا زاده،تکی داده وِ بالشتِ زمون
هی نیره اَوِ رُو رَه اِره
اُو گِلالِ کِرِ دَسس پُر بَرد
سَر وُ سُنگال وُ گُلالِس اسبید
برف هفتاد زمسون ،هُو قوا تازه وَرس
آساره سَرِ کُه سَر اِدُزی
نرمه نور دَم صو، ریِ برف برچ اِی زَی
کِرِ کُولِ اِشکفت، شُونِ گَله سَرِ ناده هُو وُ خُور کِرده وِ خَو
گله من قاش وِلو
هاشو وُ دال سَر مال وِ دَو
کُور کُورک کُنه خَو
بُوَره جیجه یتیم پَر مال .

 #خرم_سعیدی بهار ۹۷ خورشیدی

Telegram.me/khorram_saeedi
Ayapir2.ir




نوع مطلب :
برچسب ها : شعر نو لری، شعرنو محلی بختیاری، شعر نو بختیاری، دل دردی، خرم سعیدی،
لینک های مرتبط :
جمعه 14 اردیبهشت 1397 :: خرم سعیدی
" مُنُو دل "
مِن بهاری کِه همه هاچق اِبُون
خُومِ تَک مَندم وُ پاهیز دلم
هیچ مَندیرِ کسی نیم، کِه بِگُوسیم " آخَی "
مُو دلم ایخُو کِه تا، بِقِلیپُم منِ تاریکی دل
رَهِ پاکی بُوُرُم
دل مو تنگ اَویده سی خُوس
مَنِشینین کِلِ یُو، وُ بِدین دلداریس
گفت وُ لُفت خُونِه هِلین سی یه دَمُون دی ایسا
دلِ مُو پُرِ پُرس، شادی وُ ناشادی هید
خُومِ تُک مّندم وُ دنیای دلم
کِه کُرور تا وِ کُرور،هَوَس وُ دادن دل لیش وُ دُرو، هُو اِی اَرزِه خُوسِ تّک
خُوم تّک هیدم وُ تینای دلم
کِه پُرِس هید قشنگی وُ بّفا، یَه رنگی
تُنه دادم وِ هَمُو  " پیر مَهمی "
نَپِرُونین خَشیِ دلِ مُونه وا یَه " پِخی "

#خرم_سعیدی . بهار۹۷ خورشیدی
@khorran_saeedi
ayapir2.ir




نوع مطلب :
برچسب ها : مُنو دل، شعر نو لری، شعر نو بختیاری، شعر نو لری بختیاری، خرم سعیدی،
لینک های مرتبط :
جمعه 28 مهر 1396 :: خرم سعیدی
" مَلکِمیت "

اَی بَرد شیر
دل دِه وِ مَتلم
مُو بَلگ زرد بلیطم
وا نم نم پُئیز
چی دال مندیرمه
خَلکن خَچه آسمون .
جیکِشتم،مین بلگ اور
وا تیغشت افتو وِ رُه کُه
چی بِنگشتی کِه بِوینه مار بَچَلس خُوره
سی تَریده ستمی کِه چی اَو رَوونه
وِ دیر ایا .

#خرم_سعیدی پاییز ۹۶ خورشیدی
 Ayapir2.ir




نوع مطلب :
برچسب ها : خرم سعیدی، شعر نو لری، شعر نو لری بختیاری، شعر نو بختیاری،
لینک های مرتبط :
شنبه 18 شهریور 1396 :: خرم سعیدی
" شُون وُ شَو "

غیرزا ویقه ککاونگی و دیر
درنگشتی نبی
دَس وُ پا اَفتو وِ پِخو
زیر بهون آسمون اسیر .
مَه وارازنیده وِ فیس
چی بهیگ،پا سر آسمون نها
تَوِه زنگ خورد آسمون پرس تِنَه .
اُردی لشکر شو
جُور هَفی دُهونِس واز سی خَوردن
اِی گُوی ملایِ مال
طلسمس کرده قَدِ بَرد.
شُون گله بال قاش
نی شیتس گُر لو
بیتا " آ داراو" خوند و درد
" چطو نفتانه بردن،چطو حق مونه خوردن"
" یُو روخونه طلاهه"
" من ملکای ایما،شو و رو ادراهه"
" اویه جور لیره،اما صحاو ای او"
"و تشنهی امیره..."
داد و قال وس و مال
گله گرگی اوی...

#خُرم_سعیدی تابستان۹۶ خورشیدی

Ayapir2.ir




نوع مطلب :
برچسب ها : خرم سعیدی، شعر نو بختیاری، شعر نو لری بختیاری، شعر نو لری، شعر نو محلی بختیاری، شعرنو محلی لری،
لینک های مرتبط :
چهارشنبه 25 مرداد 1396 :: خرم سعیدی
" مندیر دل تنگ "

پِرکِ بایُم، مَسِ بارون دَم پَسین
اَفتو وُ تَپ تَپ گُروسک مین اَور
نَئره ی بی زُون نُو گُل سایِ دار
سَر تَکون اِی دا وُ اِی گُو مینِ لَو
نُو بهارونت مُوارک با گَگو
قیلِ شَو پا اِی گُشی اِی نا وِ دَو
مینِ دریا آسمون پَل زید هُو
تُولَیین مَه،دُهل زی،ساز باد
بازی دوپا سه پا گُل یاد دا
آساره جُور اَنگشتی کِه منده مین هُل
چشمک ای زَی نُمزدس اُو رُه رُها
شَو کِلِ چَشمه اِگُلنیدم تَشی مُو بالِ کُه
تَینایی دلتنگی وُ نَیشیت مَست
مُرغِ دل مَندیر،بال ای زَی بُریده نیم سَر
خارِ غم وِ لَو رَسونه،جُون وِ نِفت ای زَی وِ دَر
باغ ویرُم حُشک وا تَقدیر پیر
تاتِه تَمارزُو،تاتی تاتی کُنُون
بالِ گُور نُور بیدادی اِخُوند
دَس زَی اَقَنه ای شِرنی وِ درد
حال مردم بَد بَتر ،ریسُون چِه زرد
رنگ وُ ری افتو بُری اِز ترسِ شو
شو تُو کی ای ری ولات ایما وِ در

#خُرم_سعیدی تابستان۹۶ 
Ayapir2.ir




نوع مطلب :
برچسب ها : خرم سعیدی، شعر لری بختیاری، شعر لری، مندیر دلتنگ، شعر نو بختیاری،
لینک های مرتبط :
شنبه 10 تیر 1396 :: خرم سعیدی
خرم سعیدی:
"خَوپلا "
*نوعی شعر گویشی شبیه بحر طویل*

کُهِ لَو تشنه دلِ تنگ وِ گرمای توستون،بنشسته وِ کُپِ چاله صَرا کِه پُرس خارخُلونه کِه تُکه وِ جیرس خین رَوونِ وِ منِ دشت وُ بیاوون.
گَو یَو تُو بِنه بادِ چپی دِر اِخوره دَورِ سَر ایچو،بلند ایبوه چی دیو،تنیره اِکشه،کُور کُنه تیهِ هر کی کِه تیس وازه وُ قُلف ای زنه لوا،کِه وا کور بُوی وِ کَر وُ آرُم بری وُ یای ، مثِ یه کلِ دَهولی کِه یه بِنگشت نَترسه وِ وَرت مینِ زمونه.
تَش وَسه وِ ایچو،تُو اگوی دالوِ پوز بسه نشسته سرِ خَل کرده وُ واگیل جوس باد زَنه تا تشِ چالس بگره جون،وَنه دیلق وُ سُوسه کلِ ای دار وُ درهدای ولاته،گهِ گاهی،دیِ ای چاله اِره مینِ تیس سُور ابو خَرس اریزه،کنه نرفین وُ اکفنه،وُ هی سینه کُوِه،غُر ازنه کِه،کُر یاین بنیرین یُو چه روزیه کِه چی شَوِ سیاهه،همس آلیده،نفس گِر، وریسه وِ سرِ پا وُ اغارنه: هالو مُو دلم خینه وِ ای کهنه ولاتا کِه پرس نکبت و شیمه شوِ شهی منِ پوزانه گریده،کی دیده بهاری علفس شه بوه،ای گوی کِه بخونده ککاونگی وِ سرِ هر شُکه بُرگی منِ ای مِلک ، و یا رِهدنه خاک آدمِ مُرده وِ منِ  هُو،که رُومسته سرِ یک،شَوس اِز روز بتر، روز وِ شو لیشتره ایچو.... فیچم مُو وِ خو باز تیه دِونم خُومِ تک بینم و تینا،سرم اینم مث دیه  وُ اخوسم.

#خرم_سعیدی تابستان۹۶خورشیدی

Ayapir2.ir

Telegram.me/khorram_saeedi




نوع مطلب :
برچسب ها : خرم سعیدی، شعر لری، شعر بختیاری، شعر نو لری، شعر نو بختیاری، نوعی بحر طویل بختیاری،
لینک های مرتبط :
پنجشنبه 8 تیر 1396 :: خرم سعیدی
ﺧﺮﻡ ﺳﻌﻴﺪﻱ:
" پیرُنی "
*هرچند از عناصر شعری تهی ست،اما روزگاری بخشی از روش درمان بوده*

جاوِری خط چپ دار
سر کتاوس ور داشت
طالهس چید و بگو
دلسیا کافر کُه،نظرس کرده یونه
دو سه بلگ قاقذِ شه پیسه بکی
یُون،حَویرس بِگر وُ پارچه سوز
سَر باهی راست کُرت بند دَدُوم
دُیمینه تُو بون وُر منِ یَه پاله اَوس دِه بخوره
دِو گُلو زاگ اسبید وا دینشت
دِر بدِه دَورِ سرس وَن منِ تَش
نِمکِ نَر،مِل گرگ،سَوز مُره
اِکِنم اَوسی وُ بندم دَم هر جُمبنده
تا چهل رُو نَخوره اِسبیدی
زیر دِرهدی نگدرده وِ شُمی
چارشمبد هُو نَریزه وِ خُس اَو
وِ جدم دی نکنه پیرونی.

#خرم_سعیدی تابستان۹۶ خورشیدی
Ayapir2.ir
Telegram.me/khorram_saeedi




نوع مطلب :
برچسب ها : خرم سعیدی، پیرونی، شعر نو بختیاری، شعر نیمایی بختیاری، شعر لری بختیاری،
لینک های مرتبط :
یکشنبه 14 خرداد 1396 :: خرم سعیدی
خرم سعیدی:
« دالو شو »

شٙو،پٙسِ هٙف کُه سِه وِ خٙو
ویر روز،بلااویده مِن باد
پشت پوست شو
آساره یٙل پیر،اسیر
جُورٍ سٙرِ بریده وِ خٙو
نورِ سِوکِ مٙه،گوش تیز ای کی
دالوی گو:
گاشه سُوار اسبید پوش،
کیونوی صُو
پاپتی وِ ای برهوت
وِ پُشت شٙو درا
مین میدونِ شُمشیر شیون خین.

#خرم_سعیدی خورداد۹۶
Ayapir2.ir

Telegram.me/khorram_saeedi




نوع مطلب :
برچسب ها : خرم سعیدی، دالو شو، شعر نو بختیاری، شعر نیمایی بختیاری، شعر نو لری بختیاری،
لینک های مرتبط :
یکشنبه 13 فروردین 1396 :: خرم سعیدی
ﺧﺮﻡ ﺳﻌﻴﺪﻱ:
« غم شون »

دٙوٍ دٙس تنگی زِمین وُ اُو شٙوا پهن وُ فراغِ ای زمسون دِی رٙه
تٙرکی سردِ بهار،کُم شٙون،جِر ای دا
دٙم صُو داشت ابی رُستم زا (۱)
سٙر وُ کُول همه جا بِر ای زی
پیش پا صُو کِه نُک کُه بپِره
تیه چشمه اگشی وُر مٍن دشت
دل تنگ آسمون،گُلس هی واز ای بی
هیرد هیرد،گاه اِری خرس تیه.
شٙوچٙری،میسمِ میسون چارنی دی سٙر اُوی
شُون گله نِ اٍرُوند،مین علفچر کِه خٙری بی اٙرباو
پٙریون،کاردیم کالی وِ وٙرس،تُند کی پا
خٙر وُ شله نٍ اورد مین بکال گوشه قاش
تٙش وُتُنگی کِر اِشکفت بِنا هُو واکار
دٙس وِیرد،پاتیل شه نه بکشی اِز تُربه
بُز کالی کِه بِکِی تیشترزا،شیر جِک دُو وُ بکی راس لِوی
کُه تٙش هی ابلیوست وُ اچرنی وِ هوا
کِتری سِه وِ کِلس لُق ای کند
دٙس گرم کی کُپِ چاله وُ وُلانی وِ یک وُ کیف ای کی.
شُون غارنی کُوْ تُو کینی کِه وِ دیر داری ایای
سگِ هُشکُو هُو بکی،ناد وِ دٙو رٙه وِ جلو
سگ صحاوس اٙشنی،دیم نا وُرمنِ کا دُونگ ندا
پا وِ پا صاحوِ سایه هُو اُوی ری وِ گله.

#خُرم_سعیدی سیزده فرودین ۹۵




نوع مطلب :
برچسب ها : خرم سعیدی، غم شون، شعر لری بختیاری، شعر نو بختیاری، شعر نیمایی بختیاری،
لینک های مرتبط :
پنجشنبه 10 فروردین 1396 :: خرم سعیدی

«بٙزیٙر ۲»

شٙوکُله نِ وٙرداشت
شال کٙد سست ای کی
سرِ وِرد سایه بٙنه
داسِ وا نُک زٙی گِل
ریس اِی گُوی تٙشک زیده انار
جُور مُور بی دینِ کار.
گِلی مٙشکِ گِری
اٙو قلا دٙریز کی
غُلغُل اٙو مین گِلی
قُرقُریس ای جُمنی
اٙو‌ وِ چیرٙوِ شُکه
دیم سِویلس ریسس
تٙهر اکی گٙردنسه کیف ای کی.
ای نیشت وا افتو
حُشک کی وا اُفتین
عرقِ بین دُو بُرگ
زیر لٙو هی ای خوند:
« گٙره وُ گٙرما»
«ای بی داد هی» 
« دلم زمنده»
« هر کی که گرنه کاشت»
« دا دا دا»
« نهلس نمهنه.....»
#خُرم_سعیدی    

Telegram.me/khorram_saeedi




نوع مطلب :
برچسب ها : خرم سعیدی، بٙزیر، شعر نو بختیاری، سعر نو لری بختیاری، شعر نیمایی بختیاری،
لینک های مرتبط :
جمعه 20 اسفند 1395 :: خرم سعیدی

« مال چواسه »

جُورِ بازبازک اِبازن شِو وُ رُو
آسمون واز وُ فراق
شٙوِ پر رازِ نهاده سٙرِ شُون
جُورِ « هرکول» زمون.
دیِ شو بال اِگُشه
یابو آسارنه بٙسه سرِ سٙرد آخورِ کُه
لچک الماس نما نادِ وِ سر اِی دٙونه
شٙوکُله مٙه نِه نهاده گُر سر فیس اِکُنه
وا لِورگ باد صٙوق
گرگ لُوق ناد وِ دٙو
غولِ سایه وِ شتاو ای ورگشت
کاکونگ زیر شُکه
داغ دل ایخونه
یُو چِه مالیه دیه
کِه چنو دٙمبٙرده
همه چیس هید چواسه ایچو
ظلمونی بگریسونِ وِ چی «اسکندر»

#خُرم_سعیدی ۹۵خورشیدی
Telegram.me/khorram_saeedi




نوع مطلب :
برچسب ها : خرم سعیدی، شعر نو لری بختیاری، شعر نو بختیاری، شعر نو لری، مال چواسه،
لینک های مرتبط :
پنجشنبه 14 بهمن 1395 :: خرم سعیدی

«آسمونی مردم»

خٙوٍ خال خیالت
غُوار غم ریزه وِ دلِ بی قرار
اٙی بی سوزه زار،زمستونی بهار
دِهون تفنگت بی فریاد داد
لشکر اور کورت،سوار سینه کُه
سر گرم بازی سایه وُ زِمین
چی گله گرگی اٙویده وِ رٙم
بادِ بادلوی آواره بیاوون 
بی گرت لیله وِ دٙو
اِژدهای شو وُ کُه دٙس داده یک
چی دالوی پوز بسه و قهر
دشنت نشسه و پوست سینه
وا غیظ و غضو
خوشی مردم خورن
مین ای زمون شیم.

#خُرم_سعیدی زمستان۹۵خورشیدی




نوع مطلب :
برچسب ها : شعر لری، شعر بختیاری، شعر لری بختیاری، شعر نو بختیاری، خرم سعیدی، آسمونی مردم،
لینک های مرتبط :
چهارشنبه 8 دی 1395 :: خرم سعیدی

«خٙوِ شٙو»

مار،سٙر گنج وٍ خٙو

کُم پٙتی گُسنه صِحاو

گِرگٍ گِرگ شُون وِ گُوش

سگ وُ گُرگ دادنه سٙرخٙط وایٙک

گُوسیل وِل مِنِ قاش

کخدا مال ندونه کِه تٙریده کِلِ مال خٙو کِرده

وِ مُو گوده یه گگو

مٙر نٙدونی ای کُر

« کهخدا پٙسبٙرکه»

تٙرس وُ تُرسا سٙرِ جا .

شٙو اِگُوی پا پِخٙوه

کی اِبُو اُو گُویِ سُور

چند گُمبک بِزنه

جُل شونه بکنه




نوع مطلب :
برچسب ها : شعر لری بختیاری، شعر نو بختیاری، شعر نو لری، خو شو، خرم سعیدی،
لینک های مرتبط :
سه شنبه 15 تیر 1395 :: خرم سعیدی


"ِ غیرتی كُر "

پِچ پِچی وَس وِ مال،كِه عَرو وَی سَرِ مرز

وِ شُمی تا دَمِ صُو لیز نَكِی

تَپِ تیلُون اِسپارد

دَس زینه وُ بِگُو

جُون تُو وَ جُون بَچَلُم

وِ همه ایل بگو،كِه حلالُم بكنن 

روز چی باد گُدشت 

گُم گُم تَول ای جنگ 

كَر كِی گوش جهون 

یَه چَوی پِشخ اَوی

كُر فُلونی كِه بِره جَنگ نُتُومِه 

بعد چَن سال اِوردن لارس 

كُتلی وارازنین 

نان واكار دُو دَس سازِ چَپی

زِنگَلِ مال،اَقه دِردن وُ بُریدن پَل سیس 

دالوی خُوند سُرو

" مُو بِمیرم سی كُر "

"سَرِ قَدس نید كِه دی " 

" چی نها هُمسرِ زینس بیوه "

#خرم_سعیدی تیر٩٥ خورشیدی




نوع مطلب :
برچسب ها : شعر لر، شعر لری بختیاری، شعر بختیاری، شعر نو لری، شعر نو بختیاری، غیرتی كر، خرم سعیدی،
لینک های مرتبط :


( کل صفحات : 2 )    1   2   



مدیر وبلاگ : خرم سعیدی
نویسندگان
نظرسنجی
نقد و بر رسی توسط بازدید کنندگان محترم








آمار وبلاگ
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :