یکشنبه 7 مرداد 1397

سال شیم

   نوشته شده توسط: خرم سعیدی    

" سالِ شیم "

اَوِرُو حُشک وُ اِلیق نی وِ ولات
نَم وُ نُول اَو کِه اِیا
دُزِن وُ اِی بَرِن اَمرُو وُ صُوا
تُو اِگُوی وَسه اَلازَنگیِ گَپ
وِ ریِ ائ دنیا
یا کِه دالُویِ شَشِه
جُمَتِس وَنده وِ حُشکی تینا
سیم سُرپ کردنه اَورانِ اِگوی
اَوراییدِر هدن وُ زَهله تِرک
هُنو چی دُوی بُریده منِ دیگ
اِگُدردن لُق اِرن، دَر نی وَنن
گرتِ لیله بنهاده وا کار
دارِ کوهانِ بِکرده ناکار
گله کِل مال وِ خَو،بِگِری رِه زَهله
تَوِکِه زَی وِ حَشَم
گُسنئی خاک اِخُورن،باد کمنِن
شَو وُ رُو هَی تَلَف اِی بُون پِرِ مال
بالِ رُو بال اِزَنه هاشُو وُ دال
وِ گِمونم جُورِ اُو " نِفت پَهنون"
دَوِ ایما اِرَسه مینِ زَمون

#خرم_سعیدی تابستان ۹۷ خورشیدی

Ayapir2.ir

Telegram.me/khorram_saeedi


برچسب ها: شعرنو بختیری ، شعرنو لری بختیاری ، شعر محلی محلی بختیاری ، شعر محلی لری بختیاری ، سال شیم ، خرم سعیدی ،